ტელეკომპანია "იბერიის" წამყვანმა, აკაკი გოგიჩაიშვილმა სსიპ განათლების საერთაშორისო ცენტრის მიმართ ქარტიის პირველი პრინციპი დაარღვია

21 ივნ 2018
2018 წლის 19 ივნისს საქართველოს ჟურნალისტური ეთიკის ქარტიის საბჭოში გაიმართა სსიპ განათლების საერთაშორისო ცენტრის განცხადების - „ სსიპ განათლების საერთაშორისო ცენტრი ტელეკომპანია "იბერიის" წამყვანის, აკაკი გოგიჩაიშვილის წინააღმდეგ“ - განხილვა,

საქართველოს ჟურნალისტური ეთიკის ქარტიის საბჭოს გადაწყვეტილებით სსიპ - განათლების საერთაშორისო ცენტრის განცხადება დაკმაყოფილდა, საბჭომ დაადგინა, რომ ტელეკომპანია "იბერიის" წამყვანმა აკაკი გოგიჩაიშვილმა საქართველოს ჟურნალისტური ეთიკის ქარტიის 1-ლი პრინციპი დაარღვია. კერძოდ, საბჭოს პოზიციით, ჟურნალისტმა აუდიტორიას სსიპ - განათლების საერთაშორისო ცენტრის საქმიანობის თაობაზე არასწორი ინფორმაცია მიაწოდა.

განცხადების ფარგლებში ცენტრი ჟურნალისტის მხრიდან საქართველოს ჟურნალისტური ეთიკის ქარტიის შესაბამისი პრინციპის დარღვევის დადგენას ითხოვდა. საქმე ეხებოდა 2018 წლის 30 აპრილს, ტელეკომპანია „იბერია TV-ს“ ეთერით, გადაცემაში „ბიზნეს კოდი“ გასულ სიუჟეტს. საქმის განხილვას ესწრებოდნენ როგორც განმცხადებლის, ისე მოპასუხე ჟურნალისტის წარმომადგენლები.