საინფორმაციო შეხვედრა

31 მარტს 10:00 საათზე სასტუმრო “Hollyday Inn” -ის ბიბლიოთეკაში სსიპ განათლების საერთაშორისო ცენტრის  სასტიპენდიო პროგრამის -  „სამაგისტრო პროგრამები საფრანგეთში 2016-2017“ - კონკურსის გამარჯვებულებთან საინფორმაციო შეხვედრა გაიმართა.

განათლების საერთაშორისო ცენტრს, კამპუს ფრანსსა და საქართველოში საფრანგეთის საელჩოს შორის გაფორმებული მემორანდუმის შედეგად გამოცხადებულ სასტიპენდიო  კონკურსში გამარჯვებული საქართველოს 17 მოქალაქე სწავლას საფრანგეთში სამაგისტრო პროგრამაზე განაგრძობს.

სტუდენტებს   საფრანგეთის ელჩი საქართველოში ბატონი პასკალ მენიე და  განათლების საერთაშორისო ცენტრის აღმასრულებელი დირექტორი ნინო ჭელიძე შეხვდნენ და პროგრამის მსვლელობის შესახებ სრულ ინფორმაცია მიაწოდეს.

შეხვედრაზე შემდეგი სამუშაო თემები განიხილეს: ქართულ-ფრანგული სამაგისტრო პროგრამის სააპლიკაციო პროცესი და  შეფასების სისტემა; ცენტრისა და დაფინანსებული სტუდენტის ურთიერთვალდებულებები; პროგრამული მონიტორინგი და შეფასების კრიტერიუმი; სტიპენდიანტებსა და ცენტრს შორის ორმხრივი კომუნიკაციის სტრატეგია;

ღონისძიებას ასევე დაესწრნენ განათლების საერთაშორისო ცენტრისა და ფრანგული ინსტიტუტის კურსდამთავრებულები და გამარჯვებულ აპლიკანტებს  საკუთარი გამოცდილება გაუზიარეს.

სასტიპენდიო პროგრამის „სამაგისტრო პროგრამები საფრანგეთში 2016-2017“ მიზანია საშუალება მისცეს საქართველოს ახალგაზრდობას საფრანგეთში მიიღოს საერთაშორისოდ აღიარებული აკადემიური მაგისტრის ხარისხი როგორც ფრანგულენოვან, ასევე ინგლისურენოვან სამაგისტრო პროგრამებზე სწავლის შედეგად.

პროგრამის მხარდაჭერა გამოიხატება მათი განმახორციელებლების სსიპ განათლების საერთაშორისო ცენტრის, საფრანგეთის საელჩოს საქართველოში და კამპუსს ფრანსის ერთობლივ ფინანსურ უზრუნველყოფაში.

საქართველოსა და საფრანგეთის ერთობლივი სახელმწიფო დაფინანსებით სწავლის დასრულების შემდგომ კურსდამთავრებულები საქართველოში დაბრუნდებიან და მოღვაწეობას განაგრძობენ შესაბამის სფეროში 3 წლამდე ვადით.

პროგრამის ფარგლებში გამოცხადებული პრიორიტეტული მიმართულებები/სპეციალობებია:

          აგრარული მეცნიერებანი;
          განათლება;
          ინჟინერია;
          მეცნიერება/საბუნებისმეტყველო მეცნიერებანი;
          სოციალური მეცნიერებები;
          ჰუმანიტარული მეცნიერებანი;
          სამართალი;
          არქიტექტურა;
          საჯარო მმართველობა;
          მენეჯმენტი.