პროგრამის აღწერა
უნგრეთის მთავრობის სტიპენდია „Stipendium Hungaricum” დაარსდა 2013 წელს. საქართველოს მოქალაქეებს აღნიშნული პროგრამით სარგებლობა შეუძლიათ 2016 წლიდან, საქართველოსა და უნგრეთს შორის სახელმწიფოთაშორისი შეთანხმების საფუძველზე.
„Stipendium Hungaricum 2025-2026”-ის საფუძველს წარმოადგენს საქართველოს განათლების და მეცნიერების სამინისტროს და უნგრეთის საგარეო საქმეთა და ვაჭრობის სამინისტროს შორის 2023 წლის 12 ოქტომბერს გაფორმებული მემორანდუმი, რომლის ფარგლებშიც უნგრეთის მთავრობის მიერ ყოველწლიურად ფინანსდება საქართველოს 80-მდე მოქალაქე.
სასტიპენდიო პროგრამის მიზანია უნგრეთის უმაღლეს საგანმანათლებლო დაწესებულებებში განათლების მიღების ხელშეწყობა საქართველოს მოქალაქეებისთვის და ქვეყნის ეკონომიკური, სოციალური და კულტურული განვითარებისათვის, შრომის ბაზრის მოთხოვნებიდან გამომდინარე, კვალიფიციური, საერთაშორისო სტანდარტების შესაბამისი უნარებისა და ცოდნის მქონე კადრების მომზადება.
პროგრამის ადმინისტრირებას, კონკურსანტთა ნომინირების მიზნით, ახორციელებს სსიპ განათლების საერთაშორისო ცენტრი, ხოლო ნომინირებულ კონკურსანტთა უნივერსიტეტში ჩარიცხვის შემდეგ სტიპენდიის მინიჭების შესახებ საბოლოო გადაწყვეტილებას იღებს უნგრეთის მხარე (Tempus Public Foundation).
კონკურსში მონაწილეობის უფლება აქვს საქართველოს მოქალაქეობის მქონე პირს, ან პირადობის ნეიტრალური მოწმობის ან/და ნეიტრალური სამგზავრო დოკუმენტის მფლობელს, ამავე პროგრამით დადგენილი პირობების შესაბამისად.
სასტიპენდიო პროგრამის ფარგლებში, უნგრეთის მთავრობის მხრიდან ფინანსდება საბაკალავრო, სამაგისტრო, ინტეგრირებული სამაგისტრო (OTM), სადოქტორო საფეხურების აკადემიური პროგრამები, სემესტრული გაცვლითი პროგრამები და სასერტიფიკატო (Non-degree) კურსები.
დეტალური ინფორმაცია პროგრამაში ჩართული უნგრეთის უნივერსიტეტების, აკადემიური პროგრამების, სტიპენდიასთან დაკავშირებული ვალდებულებების, ვადების/პროცედურების/წესებისა და კოორდინატორების შესახებ განთავსებულია ვებ-გვერდზე: https://stipendiumhungaricum.hu/partners/.
პროგრამის განხორციელება
პროგრამის განმახორციელებელი მხარეები არიან:
• საქართველოს მხრიდან - სსიპ განათლების საერთაშორისო ცენტრი
• უნგრეთის მხრიდან - ტემპუსის საზოგადოებრივი ფონდი.
3.1. განაცხადის წარმოდგენის პროცედურა
ელექტრონული განაცხადის შევსება და დოკუმენტაციის ატვირთვა წარმოებს პარალელურად, სსიპ განათლების საერთაშორისო ცენტრის ელექტრონულ სისტემასა https://app.iec.gov.ge და უნგრეთის ტემპუსის საზოგადოებრივი ფონდის Dream Apply-ის ელექტრონულ სისტემაში https://apply.stipendiumhungaricum.hu/ .
საკონკურსოდ განიხილება მხოლოდ ორივე სისტემაში სრულყოფილად წარმოდგენილი განაცხადი, ყველა საჭირო თანდართული დოკუმენტაციით, რომელიც ატვირთულია დადგენილი ვადებისა და წესების დაცვით. ელექტრონულ სისტემებში დოკუმენტის ატვირთვა, დამახსოვრება და რედაქტირება შესაძლებელია მხოლოდ განაცხადის გაგზავნამდე.
3.2. საკონკურსო მოთხოვნები და წარმოსადგენი დოკუმენტაცია
Dream Apply-ის სისტემაში წარსადგენი დოკუმენტაციისა და საკონკურსო მოთხოვნების შესახებ ინფორმაცია ხელმისაწვდომია უნგრეთის ტემპუსის საზოგადოებრივი ფონდის ვებ-გვერდზე:
➢ საბაკალავრო, სამაგისტრო, ინტეგრირებული სამაგისტრო და სემესტრული გაცვლითი პროგრამები, სასერტიფიკატო (Non-degree ) კურსები: stipendiumhungaricum.hu/documents/stipendium_hungaricum/Call/BA_MA_OTM_Call_for_Applicatio ns.pdf
➢ სადოქტორო პროგრამები: stipendiumhungaricum.hu/documents/stipendium_hungaricum/Call/PhD_Call_for_Applications.pdf
• სსიპ - განათლების საერთაშორისო ცენტრის ელექტრონულ სისტემაში განაცხადის წარსადგენად საჭირო დოკუმენტაცია:
1. სამოტივაციო წერილი (ივსება ელექტრონული სისტემის ველში, ინგლისურ ენაზე);
2. CV/რეზიუმე (იტვირთება PDF ფორმატით, ინგლისურ ენაზე);
3. საერთაშორისოდ აღიარებული ინგლისური ენის სერტიფიკატი;
4. სოციალური სტატუსის შესახებ დოკუმენტი (არსებობის შემთხვევაში): სოციალურად დაუცველის, შეზღუდული შესაძლებლობის მქონე, იძულებით გადაადგილებული, საქართველოს ოკუპირებულ ტერიტორიებთან გამყოფი ხაზის მიმდებარე სოფლებში დაზარალებული ან/და მაღალმთიან დასახლებაში მუდმივად მცხოვრები პირის სტატუსის დამადასტურებელი დოკუმენტი (ნათარგმნი ინგლისურ ენაზე, თარგმანი დამოწმებული სანოტარო წესით).
სწავლის საფეხურის შესაბამისად კონკურსანტმა ასევე უნდა წარმოადგინოს შემდეგი სავალდებულო დოკუმენტაცია:
• საბაკალავრო და ინტეგრირებული სამაგისტრო პროგრამა
- ატესტატი/ცნობა აკადემიური ხარისხის მინიჭების შესახებ (დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- ნიშნების ფურცელი (დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- ცნობა სკოლის მოსწავლის სტატუსის შესახებ (სკოლის დამამთავრებელი კლასის მოსწავლეებისთვის. დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- რეკომენდაცია სკოლიდან (სავალდებულოა სკოლის დამამთავრებელი კლასის მოსწავლეებისთვის. დოკუმენტი უნდა იყოს შედგენილი ან ნათარგმნი ინგლისურ ენაზე);
- რეკომენდაცია უნივერსიტეტიდან (მეორე ან მომდევნო კურსის სტუდენტებისათვის, რომლებიც უნგრეთის უმაღლეს საგანმანათლებლო დაწესებულებაში სწავლობენ).
• სამაგისტრო და სადოქტორო პროგრამა
- დიპლომი/ცნობა წინა საფეხურის აკადემიური ხარისხის მინიჭების შესახებ (დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- დიპლომის დანართი/ნიშნების ფურცელი (დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- ცნობა სტუდენტის სტატუსის შესახებ (დამამთავრებელი კურსის სტუდენტებისთვის. დოკუმენტი წარმოდგენილი უნდა იყოს ქართულ და ინგლისურ ენებზე, თარგმანი - დამოწმებული სანოტარო წესით);
- რეკომენდაცია უნივერსიტეტიდან (მეორე ან მომდევნო კურსის სტუდენტებისათვის, რომლებიც უნგრეთის უმაღლეს საგანმანათლებლო დაწესებულებაში სწავლობენ);
- კვლევის გეგმა, რეკომენდაცია და ხელმძღვანელის თანხმობა (მხოლოდ დოქტორანტებისათვის, შედგენილი ან ნათარგმნი ინგლისურ ენაზე).
• სემესტრული გაცვლითი ან სასერტიფიკატო (Non-degree) პროგრამები
- ზემოთ მოთხოვნილი დოკუმენტაცია სწავლის საფეხურის შესაბამისად.
* სახელოვნებო მიმართულების კონკურსანტებისათვის დამატებით წარმოსადგენია პორტფოლიო / აუდიო პორტფოლიო სამუსიკო მიმართულებისთვის.
შენიშვნა: კონკურსანტს შესაძლებლობა აქვს, „სხვა დოკუმენტები“-ს ველში ატვირთოს დამატებითი დოკუმენტაცია, რომლითაც დასტურდება მის მიერ აკადემიურ თუ სხვა აქტივობებში ჩართულობა/მიღწევები (ასეთის არსებობის შემთხვევაში).
3.3. ვადები
ელექტრონული განაცხადის წარმოდგენა წარმოებს:
- სსიპ - განათლების საერთაშორისო ცენტრის სისტემაში: 2024 წლის 15 ნოემბრიდან - 2025 წლის 15 იანვრის 17:00 საათამდე (ადგილობრივი/თბილისის დროით).
- უნგრეთის Dream Apply -ის სისტემაში: 2024 წლის 15 ნოემბრიდან - 2025 წლის 15 იანვრის 14:00 საათამდე (ცენტრალური ევროპული დროით).
განაცხადების მიღების პერიოდში კონსულტაციები სსიპ განათლების საერთაშორისო ცენტრში ჩატარდება ყოველ ოთხშაბათს 14:00 სთ-ზე.
3.4 განაცხადის შეფასების პროცესი
სტიპენდიაზე ნომინირების მიზნით, საკონკურსო განაცხადებს აფასებს სსიპ განათლების საერთაშორისო ცენტრის საკონკურსო კომისია, რომელიც დაკომპლექტებულია როგორც საქართველოს, ისე უნგრეთის მხარის წარმომადგენლებისგან. კომისიის შემადგენლობა, უფლებამოსილება და საქმიანობის წესი მტკიცდება სსიპ - განათლების საერთაშორისო ცენტრის აღმასრულებელი დირექტორის ბრძანებით.
საკონკურსო კომისიის მიერ განაცხადები განიხილება სამეტაპიანი კონკურსის ფარგლებში:
1. I ეტაპი - სსიპ განათლების საერთაშორისო ცენტრის მიერ ელექტრონული განაცხადების ტექნიკური ექსპერტიზა.
2. II ეტაპი - საკონკურსო კომისიის მიერ ელექტრონული განაცხადების შინაარსობრივი შეფასება.
3. III ეტაპი - გასაუბრება საკონკურსო კომისიასთან.
კონკურსის პირველ ეტაპზე, კონკურსანტს შეიძლება მიენიჭოს ბონუს ქულა (მაქსიმუმ - 5 ქულა) სოციალურად დაუცველის, შეზღუდული შესაძლებლობის მქონე, იძულებით გადაადგილებული, საქართველოს ოკუპირებულ ტერიტორიებთან გამყოფი ხაზის მიმდებარე სოფლებში დაზარალებული ან/და მაღალმთიან დასახლებაში მუდმივად მცხოვრები პირის სტატუსის დადასტურების შემთხვევაში (თითო სტატუსისთვის - 1 ქულა). ბონუს ქულა/ქულები დაჯამდება მხოლოდ კონკურსის მეორე ეტაპზე მიღებულ შედეგთან ერთად.
სსიპ განათლების საერთაშორისო ცენტრის მიერ, საკონკურსო კომისიის გადაწყვეტილების საფუძველზე, ნომინირებული კონკურსანტების სია, არაუგვიანეს 2025 წლის 28 თებერვლისა, წარედგინება უნგრეთის ტემპუსის საზოგადოებრივ ფონდს.
შესაძლოა, უნივერსიტეტში ჩარიცხვის პროცედურები დამატებით ითვალისწინებდეს გამოცდას/გასაუბრებას. უნივერსიტეტში ჩარიცხული სტუდენტებისთვის უნგრეთის მთავრობის სტიპენდიის საბოლოო მინიჭება ხდება უნგრეთის საზოგადოებრივი ფონდის მიერ.
კონკურსანტებს უნგრეთის მთავრობის სტიპენდიის მინიჭების შესახებ საბოლოო გადაწყვეტილება ეცნობებათ უნგრეთის ტემპუსის საზოგადოებრივი ფონდის მხრიდან, ელექტრონულ ფოსტაზე, 2025 წლის ივნისის ბოლომდე.
სსიპ განათლების საერთაშორისო ცენტრსა და გამარჯვებულ კონკურსანტს შორის გაფორმდება ხელშეკრულება თანამშრომლობის შესახებ.
დაფინანსება
უნგრეთის მთავრობის მხრიდან სტიპენდიის ოდენობისა და პირობების შესახებ დეტალური ინფორმაცია იხილეთ: https://stipendiumhungaricum.hu/
საქართველოს მთავრობა, 2024 წლიდან, “Stipendium Hungaricum”-ის მაღალი აკადემიური მოსწრების მქონე სტუდენტებს სთავაზობს სასწავლო გრანტს - „წარჩინების სტიპენდია“. სსიპ განათლების საერთაშორისო ცენტრი საგრანტო პროგრამას აცხადებს ყოველსემესტრულად. გრანტის ათვისება არის ნებაყოფლობითი.
იხილეთ ელექტრონული სარეგისტრაციო სისტემის მოხმარების წესი
ბრძანება
ბრძანების დანართი