საგრანტო პროგრამა კურსდამთავრებულთათვის (შემდგომში „პროგრამა“) არის სსიპ განათლების საერთაშორისო ცენტრის (შემდგომში „ცენტრი) პროგრამა, რომლის ფარგლებშიც, ცენტრის სასტიპენდიო პროგრამების კურსდამთავრებულებს შესაძლებლობა ეძლევათ, ქვეყანაში დაბრუნების შემდგომ, განახორციელონ პროექტები მათი შრომის ბაზარზე ინტეგრირების, დასაქმებისა და კარიერული განვითარების ხელშეწყობისთვის ცენტრის მიერ კონკურსის წესით გაცემული გრანტებითა ან/და სხვა თანადაფინანსებით.
კონკურსში განაცხადის წარდგენის უფლება აქვთ ცენტრის კურსდამთავრებულებს, რომლებმაც ცენტრის პროგრამის ფარგლებში მიიღეს სასწავლო გრანტი/სტიპენდია, დაასრულეს სწავლა საზღვარგარეთ, დაბრუნდნენ საქართველოში და ასრულებენ სახელშეკრულებო პირობებს.
პროგრამაში მონაწილეობის მისაღებად, კონკურსში განაცხადის გაკეთებისას, პროექტის განმახორციელებელ გუნდში, პროექტის ხელმძღვანელის გარდა, ჩართული უნდა იყოს მინიმუმ ერთი კურსდამთავრებული მაინც.
პროექტების ძირითადი და პრიორიტეტული მიმართულებები მოცემულია პროგრამაში. თუმცა, აღნიშნული ჩამონათვალი არ ზღუდავს დაინტერესებულ პირს საპროექტო განაცხადის წარდგენასა და სასურველი სხვა თემატიკის შერჩევაში.
საგრანტო პროგრამაში მონაწილეობისას, კურსდამთავრებულებმა აუცილებელია გაითვალისწინონ პროგრამის მიზნები, დადგენილი შეფასების კრიტერიუმები და სხვა კომპონენტები. შეფასების კრიტერიუმები გამოქვეყნებულია საჯაროდ.
მცირე საგრანტო პროგრამის კონკურსის ფარგლებში შეფასება 100 ქულიანია. აქედან:
- განაცხადის შინაარსობრივი შეფასებისას (მეორე ეტაპი) კანდიდატმა შეიძლება მიიღოს მაქსიმუმ 60 ქულა;
- გასაუბრებისას (მესამე ეტაპი) კანდიდატმა შეიძლება მიიღოს მაქსიმუმ 40 ქულა.
შემოსულ საპროექტო განაცხადებს აფასებს საგრანტო პროგრამის საკონკურსო კომისია, რომელიც შედგება არანაკლებ 7 წევრისგან.
საგრანტო პროგრამის საერთო ბიუჯეტია 300 000 (სამასი ათასი) ლარი.
პროგრამის ფარგლებში დასაფინანსებელი პროექტების რაოდენობა არ არის წინასწარ გასაზღვრული. იგი დამოკიდებულია კონკურსში შემოსული პროექტების ბიუჯეტებზე, საკონკურსო კომისიის შეფასებებსა და მიღებულ გადაწყვეტილებაზე.
პროგრამის ფარგლებში მოთხოვნილი თანხის მაქსიმალურმა ოდენობამ თითოეულ საპროექტო განაცხადზე შეიძლება შეადგინოს 50,000 ლარი - თანადაფინანსების არსებობის შემთხვევაში, ხოლო თანადაფინანსების არარსებობის შემთხვევაში - 35,000 ლარი. კონკურსის მონაწილეებს შეუძლიათ მოითხოვონ სრული ან ნაწილობრივი დაფინანსება, ასევე, მოიზიდონ დამატებითი ფინანსური წყაროები.
თანადაფინანსება, პროგრამის ფარგლებში, ნიშნავს სხვა ფიზიკური თუ იურიდიული პირის ფინანსურ კონტრიბუციას პროექტის განხორციელებაში, რაც აუცილებლად უნდა იყოს გამოხატული თანხითა და მისი რეალური ხარჯვითი ნაწილით.
თანადაფინანსებად არ ჩაითვლება მატერიალური ქონების დროებით სარგებლობაში გადაცემა, სერვისის უფასო გაწევა ან უცხოელი/ადგილობრივი ექსპერტის ანაზღაურების გარეშე პროექტში ჩართულობის თანხმობის წერილის წარმოდგენა.
თანადაფინანსების კომპონენტის ჩასათვლელად, აუცილებელია ცენტრის აღმასრულებელი დირექტორის სახელზე წარმოდგენილი იქნას ოფიციალური წერილი, შესაბამისი თანხისა და მისი გამოყენების მიზნობრიობის დაზუსტებით. აღნიშნული წერილი წარმოდგენილი უნდა იყოს პროგრამის დანართი N3-ის სახით.
თანამშრომლობა ნიშნავს სხვა ფიზიკური თუ იურიდიული პირის არაფინანსურ კონტრიბუციას პროექტის განხორციელებაში. თანამშრომლობად ჩაითვლება მატერიალური ქონების დროებით სარგებლობაში გადაცემა, სერვისის უფასო გაწევა ან უცხოელი/ადგილობრივი ექსპერტის ანაზღაურების გარეშე პროექტში ჩართულობის თანხმობის წერილის წარმოდგენა.
თანამშრომლობის კომპონენტის ჩასათვლელად, აუცილებელია წერილი წარმოდგენილი იყოს საგრანტო პროგრამის დანართი N4 ან/და დანართი N5-ის სახით.
თანადაფინანსების შემთხვევაში, ოფიციალური წერილის წარმოდგენით (დანართი N3), გამცემი ადასტურებს შესაბამისი ფულადი კონტრიბუციის აღების ვალდებულებას. შესაბამისად, პროექტის განხორციელების პროცესში, დასტურდება თანადამფინანსებლისგან მიღებული თანხის ფაქტობრივი ხარჯვა.
თანამშრომლობის კომპონენტის დროს კი, აუცილებელი არ არის თანხის ფაქტობრივი ხარჯვის კომპონენტის არსებობა და ნებისმიერი სხვა ტიპის თანამშრომლობა აღნიშნული კომპონენტის დაკმაყოფილებად ჩაითვლება. აღნიშნულ შემთხვევაში ივსება თანამშრომლობის ფორმა (დანართი N4 ან/და დანართი N5).
საერთაშორისო კომპონენტი გულისხმობს საზღვარგარეთის კონკრეტული დაწესებულებიდან შესაბამისი კვალიფიკაციისა და გამოცილების კონსულტანტის/ექსპერტის მოწვევას, რომელიც თავის საქმიანობას შეიძლება ახორციელებდეს როგორც უფასოდ, აგრეთვე, ანაზღაურების საფუძველზე.
პროექტის შესაბამისი ხარისხით განხორციელებისთვის, სურვილის შემთხვევაში, შესაძლებელია საზღვარგარეთ მოღვაწე, შესაბამისი კომპეტენციის მქონე პირის საქართველოში ჩამოყვანა, რისთვისაც საჭიროა მისი თანამშრომლობის წერილის წარმოდგენა.
თანამშრომლობის წერილში (დანართი N4) მითითებული უნდა იყოს აღნიშნული პირის მზაობა პროექტში მონაწილეობის მიღებაზე, აგრეთვე, საქართველოში მისი ვიზიტის სავარუდო თარიღი.
პროექტის განხორციელებისას, უცხოელი კონსულტანტს მოწვევის შემთხვევაში, პროექტის ბიუჯეტით შესაძლებელია გათვალისწინებული იქნას მისი ჰონორარი, საქართველოში მგზავრობისა და განთავსების ხარჯების ანაზღაურება.
საგრანტო პროგრამის ფარგლებში წარმოდგენილი პროექტის რეგიონალური კომპონენტი არის პროგრამის დამატებითი ელემენტი, რომლის მიხედვითაც, შეფასების პროცესში, კონკურსში უპირატესობა მიენიჭება პროექტებს, რომლებიც ორიენტირებული იქნება საქართველოს რეგიონების განვითარებაზე. რეგიონალური კომპონენტი გულისხმობს პროექტის განხორციელებას რეგიონში ან/და რეგიონისთვის, მისი განვითარების ხელშეწყობის მიზნით.
პროგრამის გამოცხადებისას, ქვეყნდება როგორც პროგრამის, ისე პროგრამის ფარგლებში გამარჯვებული პროექტების განხორციელების ვადები.
საგრანტო პროგრამის ფარგლებში განაცხადის მიღება შესაძლებელია მხოლოდ საკონკურსო ვადაში. პროგრამით გაწერილია განაცხადების მიღების, ტექნიკური შეფასების, შინაარსობრივი შეფასების, გასაუბრებისა და შედეგების გამოცხადების ვადები.
პროგრამის ფარგლებში გამარჯვებული პროექტის განხორციელების ვადები კი მოიცავს მისი დაწყების, ფაქტობრივი განხორციელებისა და ანგარიშების (შინაარსობრივი და ფინანსური) წარმოდგენის ვადებს.
პროექტის განხორციელებისათვის საჭირო ყველა საფეხურის ბიუჯეტი დეტალურად უნდა იყოს გაწერილი და წარმოდგენილი ეროვნულ ვალუტაში. ბიუჯეტის შედგენისას გასათვალისწინებელია პროგრამის მიზნებთან შესაბამისობა, მიზნობრიობა, მდგრადობა და ეფექტურობა.
საგრანტო პროგრამის ფარგლებში გამარჯვებული პროექტების ხელძღვანელებს, პროგრამით განსაზღვრულ ვადაში, აქვთ პროგრამული და ფინანსური ანგარიშების წარმოდგენის ვალდებულება.
პროგრამული ანგარიში მოიცავს ინფორმაციას პროექტის მიზნების მიღწევის, მისი მდგრადობისა და ეფექტურობის შესახებ: რა მოქმედებები განხორციელდა საპროექტო განაცხადში მოცემული თანმიმდევრობით და რა დროში, რა ნიუანსები გამოვლინდა პროექტის მიმდინარეობისას და რა შედეგი დადგა პროექტის ბოლოს.
ფინანსური ანგარიში მოიცავს მიღებული გრანტის ხარჯვის აღრიცხვას გრანტის შესახებ ხელშეკრულების გაფორმების დროს წარმოდგენილი ბიუჯეტის საბოლოო ვერსიის შესაბამისად. ფინანსურ ანგარიშს თან უნდა ერთვოდეს შესაბამისი დოკუმენტები.
თუ ხელშეკრულების გაფორმების ეტაპზე, წარმოდგენილი ბიუჯეტის მიხედვით, მოთხოვნილია რაიმე ნივთის შეძენა, პროექტის დასრულების შემდეგ, ის კურსდამთავრებულის საკუთრებაში რჩება. პროექტის მიმდინარეობისას, აკრძალულია მისი რაიმე ფორმით გასხვისება ან სხვა პირისთვის განკარგვის უფლების გადაცემა.
პროექტის განმახორციელებელი პირების საგრანტო ანაზღაურება არ იბეგრება.
დაბეგვრას ექვემდებარება შრომითი ან მომსახურების ხელშეკრულების მქონე დაქირავებულ პირთა ჰონორარები.
შუალედური ანგარიშები (ფინანსური და პროგრამული) ცენტრს წარედგინება პროექტის პირველი ნახევრის დამთავრებისთანავე, მაგრამ არაუგვიანეს 2 კვირისა. აღნიშნული ანგარიში უნდა მოიცავდეს შესრულებული სამუშოს ინფორმაციას ფოტო-ვიდეო მასალასთან ერთად. ანგარიში იგზავნება თარიღითა და ნედლი ხელმოწერით ცენტრის ელექტრონულ ფოსტაზე (iec-alumni@gov.ge).
საბოლოო პროგრამული და ფინანსური ანგარიშები ცენტრს წარედგინება პროექტის გეგმა-გრაფიკით განსაზღვრული აქტივობების დასრულებიდან არაუგვიანეს 1 (ერთი) თვისა. ანგარიში იგზავნება თარიღითა და ნედლი ხელმოწერით ცენტრის ელექტრონულ ფოსტაზე (iec-alumni@gov.ge).