სსიპ განათლების საერთაშორისო ცენტრის ორგანიზებით, სვანეთში, მესტიის მუნიციპალიტეტში, სტიპენდიანტთა ყოველწლიური ფორუმი გაიმართა. ფორუმში 2025-2026 აკადემიური წლის საგრანტო კონკურსებში გამარჯვებული სტიპენდიანტები, ცენტრის პარტნიორი საელჩოს წარმომადგენლები და კურსდამთავრებულები მონაწილეობდნენ.
სამდღიანი ფორუმი სსიპ განათლების საერთაშორისო ცენტრის აღმასრულებელმა დირექტორმა, ნუნუ მიცკევიჩმა გახსნა. მან სტიპენდიანტებს კონკურსებში გამარჯვება მიულოცა და წარმატებები უსურვა. როგორც ნუნუ მიცკევიჩმა აღნიშნა, საქართველოს მთავრობა არაერთ ქმედით ნაბიჯს დგამს ახალგაზრდების მხარდაჭერის კუთხით. კერძოდ, საერთაშორისო საგანმანათლებლო პროგრამების დაფინანსებით, სტუდენტებს ეძლევათ შესაძლებლობა, განათლება მსოფლიოს წამყვან უნივერსიტეტებში მიიღონ და სამშობლოში დაბრუნების შემდეგ, საკუთარი ცოდნა და გამოცდილება ქვეყნის განვითარებას მოახმარონ. ფორუმის მონაწილეებს სიტყვით ასევე მიმართა უნგრეთის ელჩის მოვალეობის შემსრულებელმა საქართველოში, ფერენც გაბორ კრაუშმა და უნგრეთის საგანმანათლებლო სისტემასა და ორ ქვეყანას შორის განათლების სფეროში ურთიერთანამშრომლობის საკითხებზე ისაუბრა.
ცენტრის სტიპენდიანტებმა მონაწილეობა მიიღეს სადისკუსიო პანელებში, სადაც უცხოეთის უმაღლეს საგანმანათლებლო დაწესებულებებში სასწავლო პროცესის თავისებურებებს გაეცნენ. ფორუმის მონაწილეებმა განათლების საერთაშორისო ცენტრის პროგრამების, მხარეთა უფლება-მოვალეობებისა და ვალდებულებების მონიტორინგის შესახებ ამომწურავი ინფორმაცია მიიღეს, ასევე, კურსდამთავრებულთა საგრანტო, კვალიფიკაციის ამაღლების პროგრამები და დასაქმებასთან დაკავშირებული ინიციატივები განიხილეს. გაიმართა ინტერაქტიული პანელი ცენტრის კურსდამთავრებულთა მონაწილეობით, რომლის დროსაც კურსდამთავრებულებმა წლევანდელ ბენეფიციარებს საზღვარგარეთის სხვადასხვა ქვეყანაში სწავლისა და ცხოვრების შესახებ გამოცდილება გაუზიარეს.
ფორუმის ფარგლებში, მოეწყო სხვადასხვა კულტურულ-შემეცნებითი ღონისძიება და გასვლითი ტური, მათ შორის, ჰაწვალზე, სვანეთის ისტორიულ-ეთნოგრაფიულ მუზეუმში, ხერგიანის მუზეუმსა და მესტიის ლეო ფილფანის სახელობის სახალხო და ფოლკლორის თეატრში.