სსიპ განათლების საერთაშორისო ცენტრი 2024-2025 აკადემიური წლის სტიპენდიანტებთან საინფორმაციო შეხვედრებს ონლაინ რეჟიმში მართავს.
შეხვედრებში ის სტუდენტები მონაწილეობენ, რომლებიც მიმდინარე სასწავლო წელს, განათლების საერთაშორისო ცენტრის მხარდაჭერითა და დაფინანსებით, სწავლას ევროპისა და აშშ-ის წამყვან უნივერსიტეტებში აგრძელებენ.
განათლების საერთაშორისო ცენტრის წარმომადგენლები გრანტის მიმღებებს საგრანტო პროგრამების მიზნობრიობის, მხარეთა უფლება-მოვალეობებისა და ვალდებულებების მონიტორინგის საკითხებზე ესაუბრებიან და მათ საჭიროებებს ეცნობიან. სტიპენდიანტები ასევე იღებენ დეტალურ ინფორმაციას კურსდამთავრებულთა მცირე საგრანტო, კვალიფიკაციის ამაღლების პროგრამებსა და სამომავლო მხარდაჭერასთან დაკავშირებულ ინიციატივებზე.
საზღვარგარეთ განათლების მიღების ხელშეწყობის მიზნით, 2024 წელს სსიპ განათლების საერთაშორისო ცენტრმა 14 საგრანტო/სასტიპენდიო პროგრამა გამოაცხადა. 2024-2025 აკადემიური წლისთვის, საბაკალავრო, სამაგისტრო, სადოქტორო და კვალიფიკაციის ამაღლების პროგრამების ფარგლებში ჩატარებულ კონკურსებში საქართველოს 176-მა მოქალაქემ გაიმარჯვა. სახელმწიფო სასწავლო გრანტების წლიური ბიუჯეტი 5,5 მილიონ ლარზე მეტს შეადგენს.