სსიპ განათლების საერთაშორისო ცენტრს ფედერიკო მეორის სახელობის ნეაპოლის სახელმწიფო უნივერსიტეტის დელეგაცია ეწვია, რომელსაც უნივერსიტეტის რექტორი, პროფესორი მატეო ლორიტო ხელმძღვანელობდა.
განათლების საერთაშორისო ცენტრის წარმომადგენლებმა დელეგაციის წევრებს ცენტრის მიმდინარე პროექტები და სამომავლო გეგმები გააცნეს.
შეხვედრას იტალიის რესპუბლიკის საგანგებო და სრულუფლებიანი ელჩი საქართველოში, მასიმილიანო დ’ანტუონო და ქართულ-იტალიური განათლების ცენტრ „მინერვას“ წარმომადგენლებიც ესწრებოდნენ.
ვიზიტის ფარგლებში, სსიპ განათლების საერთაშორისო ცენტრსა და ნეაპოლის სახელმწიფო უნივერსიტეტს შორის ურთიერთგაგების მემორანდუმი გაფორმდა.
მემორანდუმი მიზნად ისახავს მხარეებს შორის საგანმანათლებლო და აკადემიურ სფეროში თანამშრომლობას და საქართველოს მოქალაქეებისთვის ნეაპოლის უნივერსიტეტში, სამაგისტრო და სადოქტორო საფეხურებზე, ერთობლივი მხარდამჭერი პროგრამების განხორციელებას.
ფედერიკო მეორის სახელობის ნეაპოლის სახელმწიფო უნივერსიტეტი მსოფლიოში პირველ სახელმწიფო უნივერსიტეტად ითვლება. ის 1224 წელს დაარსდა. დღეს, ნეაპოლის უნივერსიტეტის ისტორიულ კამპუსებში 90 ათასზე მეტი სტუდენტი სწავლობს.
ნეაპოლის საუნივერსიტეტო დელეგაციის ვიზიტი საქართველოში იტალიის საელჩოს მიერ ორგანიზებული კამპანიის „Evento Campania“ („აღმოაჩინე იტალია - კამპანიის რეგიონი“) ფარგლებში განხორციელდა.