13 ივნისს ევროკავშირის პროექტის „კერძო და ადმინისტრაციული სამართლის სისტემების განვითარების ხელშეწყობა საქართველოში“ ფარგლებში განათლების საერთაშორისო ცენტრს ბერლინის ადმინისტრირების აკადემიის დირექტორი, ექსპერტი ვოლფგანგ შიროკი ეწვია. აღნიშნული ვიზიტი რამდენიმე დღე გასტანს და მიზნად ისახავს საქართველოში საჯარო მოსამსახურეთა პროფესიული განვითარების სისტემის შექმნას. განათლების საერთაშორისო ცენტრის თანამშრომლებისგან შემდგარი სამუშაო ჯგუფი გერმანელ ექსპერტთან ერთად ევროპულ ღირებულებებზე ორიენტირებული დემოკრატიული და სამართლებრივი სახელმწიფოს ეფექტიანი ფუნქციონირებისათვის აუცილებელი საჯარო მოსამსახურეთა პროფესიული განვითარების ორგანიზებული სისტემის ჩამოყალიბებასა და სწავლების სისტემის შეფასებისათვის შესაბამისი სტანდარტების შემუშავებაზე იმსჯელებენ და დასავლურ გამოცდილებას გაიზიარებენ.
ვიზიტის ფარგლებში სამუშაო შეხვედრები გაიმართება მთავრობის ადმინისტრაციის, საჯარო სამსახურის ბიუროს, საფინანსო ანალიტიკური სამსახურისა და ნატო-საქართველოს პროფესიული განვითარების პროგრამის წარმომადგენლებთან.
ევროკავშირის პროექტი „კერძო და ადმინისტრაციული სამართლის სისტემის განვითარების ხელშეწყობა საქართველოში“ ხორციელდება GIZ-ის „ევროპულ სტანდარტებთან სამხრეთ კავკასიის სამართლებრივი დაახლოების“ პროგრამის მიერ.