განათლების საერთაშორისო ცენტრში 2016-17 სასწავლო წლისთვის საზღვარგარეთ სწავლის მსურველთა შერჩევა დასრულდა. წელს სასურველ უმაღლეს სასწავლებელში სწავლას დაფინანსებულები 110 ახალგაზრდა გააგრძელებს. წარმატებულ აპლიკანტებს ნაწილობრივ ან სრულად დაუფინანსდებათ უცხოეთში სწავლისა და/ან საცხოვრებელ ხარჯები. საზღვარგარეთ კვალიფიკაციის ამაღლების პროგრამის ფარგლებში გამარჯვებულები, კი მათ მიერ შერჩეულ გადამზადების პროგრამებზე დაფინანსდებიან.
გამარჯვებულები ქვეყნისთვის პრიორიტეტული შემდეგი პროგრამული მიმართულებების/სპეციალობების გათვალისწინებით შეირჩნენ: აგრარული მეცნიერებანი, განათლება, ინჟინერია, მეცნიერება/საბუნებისმეტყველო მეცნიერებანი, სოციალური მეცნიერებები, ჰუმანიტარული მეცნიერებანი, სამართალი, არქიტექტურა, საჯარო მმართველობა, მენეჯმენტი.
110 საქართველოს მოქალაქე ბრიტანეთის, აშშ-ს, შვედეთის, გერმანიის, იტალიის, ჩეხეთის, შვეიცარიის, უნგრეთის, ესტონეთის, ნიდერლანდების, იაპონიის უნივერსიტეტებში მიიღებს სამაგისტრო და სადოქტორო ხარისხს. სახელმწიფოს დაფინანსებით სწავლის დასრულების შემდგომ სამაგისტრო და სადოქტორო პროგრამების კურსდამთავრებულები საქართველოში დაბრუნდებიან და მიღებულ ცოდნას ქვეყნის განვითარებას მოახმარენ.
დაფინანსების მოპოვების მსურველებს ელექტრონული აპლიკაციის შევსება 1 თვის მანძილზე შეეძლოთ. კონკურსანტებმა, რამდენიმე საკონკურსო ეტაპი გაიარეს. აპლიკანტების დაფინანსების შესახებ გადაწყვეტილება განათლების საერთაშორისო ცენტრის საკონკურსო კომისიამ მიიღო. თითოეული კონკურსანტის შეფასებას კომისიის წევრები წინასწარ დადგენილი კრიტერიუმების მიხედვით, ერთმანეთისგან დამოუკიდებლად აწარმოებდნენ. განათლების საერთაშორისო ცენტრის საკონკურსო კომისია 9 წევრისგან შედგება, კომისია დაკომპლექტებულია სახელმწიფო უწყებებისა და საერთაშორისო საგანმანათლებლო ორგანიზაციების წარმომადგენლებით.
განათლების საერთაშორისო ცენტრი დაარსდა 2014 წელს. ცენტრის მისიაა წვლილი შეიტანოს ქვეყნის ეკონომიკურ, სოციალურ და დემოკრატიულ განვითარებაში, საქართველოში განათლების ხარისხის ამაღლებისა და კვალიფიციური კადრების მომზადების გზით.
განათლების საერთაშორისო ცენტრმა 2014 წლიდან დღემდე 270 - მდე სასწავლო სტიპენდია გასცა.