„განათლების საერთაშორისო ცენტრის სტიპენდიანტთა დასაქმების ფორუმი 2016“ - ში მონაწილეობა მიიღო 40-მდე ახალგაზრდამ, რომელთაც ცენტრის ფინანსური მხარდაჭერით უცხოეთში აკადემიური (სამაგისტრო და სადოქტორო) ხარისხი მოიპოვეს.
ფორუმი გახსნეს განათლებისა და მეცნიერების მინისტრმა ალექსანდრე ჯეჯელავამ, მთავრობის ადმინისტრაციის უფროსის მოადგილემ ნინო კობახიძემ, განათლების საერთაშორისო ცენტრის დირექტორმა ნინო ჭელიძემ და ჯანდაცვის მინისტრის მოადგილემ ზაზა სოფრომაძემ.
ფორუმის გამართვის მიზანია მაღალკვალიფიციური კადრების დასაქმების ხელშეწყობა. ახალგაზრდებს საშუალება მიეცათ პოტენციურ დამსაქმებლებს უშუალოდ გააცნონ თავისი გამოცდილება და შესაძლებლობები. აპლიკანტებით ფორუმზე სულ 40-მდე კერძო და სახელმწიფო ორგანიზაცია დაინტერესდა. ისინი გაესაუბრნენ ახალგაზრდებს, რომლებმაც განათლების საერთაშორისო ცენტრის დახმარებით უცხოეთში მიიღეს განათლება.
ახალგაზრდებს შესაძლებლობა ექნებათ გაიარონ სტაჟირება ან დაიწყონ მუშაობა სხვადასხვა ორგანიზაციაში. კურსდამთავრებულებს საშუალება მიეცათ პირადად გაცნობოდნენ სამინისტროების, სსიპ-ების, ქართულ ბაზარზე მოქმედი წამყვანი კომპანიების წარმომადგენლებს, დაესვათ მათთვის კითხვები, მიეწოდებინათ ინფორმაცია საკუთარი კანდიდატურის შესახებ.
ფორუმის ფარგლებში, მოეწყო განათლების საერთაშორისო ცენტრის „კურსდამთავრებულთა თანამშრომლობის პროგრამის სტრატეგიის“ განხილვაც. ფორუმზე მოწვეული იყვნენ როგორც ახალდაბრუნებული, ასევე უკვე დასაქმებული კურსდამთავრებულები.
ფორუმზე წარმოდგენილი იყო საქართველოს რკინიგზა, საპარტნიორო ფონდი, თანაინვესტირების ფონდი, სოფლის მეურნეობის პროექტების მართვის სააგენტო, საქართველოს ელექტროსისტემა, ასევე კერძო კომპანიები: ვისოლ-ჯგუფი, საქართველოს ინდუსტრიული ჯგუფი, ხუალინგი, საქართველოს აეროპორტების გაერთიანება და სხვა ორგანიზაციები.