18 ივნისს სსიპ განათლების საერთაშორისო ცენტრსა და რატგერსის, ნიუ ჯერსის სახელმწიფო უნივერსიტეტს შორის ურთიერთთანამშრომლობის მემორანდუმი გაფორმდა.
აღნიშნული მემორანდუმი ითვალისწინებს მხარეებს შორის საგანმანათლებლო პროცესში საერთაშორისო თანამშრომლობის გაძლიერებასა და განვითარებას, რატგერსის საგანმანათლებლო პროგრამების შესაბამისად მაღალი დონის სპეციალისტების მოზადებას, ფუნდამენტური კვლევისა და ტექნოლოგიების დარგში საგანმანათლებლო პროგრამების განხორციელების განსაკუთრებულ მნიშვნელობას საზოგადოების კეთილდღეობისა და მდგრადი განვითარებისთვის, საქართველოს მთავრობის ინტერესს უფრო ფართოდ ჩაერთოს გლობალურ საგანმანათლებლო და კვლევით პროექტებში, მხარეთა მზადყოფნას დაეხმარონ ქართველ ახალგაზრდა სპეციალისტებს, რათა მათ განაგრძონ აკადემიური საქმიანობა რატგერსში.
მემორანდუმის მიხედვით, რატგერსი უზრუნველყოფს სადოქტორო პროგრამაზე ჩარიცხულთათვის სწავლის გადასახადის 100%-ით, ხოლო სამაგისტრო პროგრამებზე ჩარიცხულთათვის 50%-ით დაფინანსებას. განათლების საერთაშორისო ცენტრი მხარეთა ფინანსური რესურსების გათვალისწინებით, დარჩენილ ხარჯებს დაფარავს. მემორანდუმი ძალაში რჩება ხუთი წლის განმავლობაში და შემდეგ განახლდება ავტომატურად, დამატებითი ხუთი წლის ვადით.
განათლების საერთაშორისო ცენტრმა აღნიშნული მემორანდუმი პარტნიორი უნივერსიტეტების სასტიპენდიო პროგრამის ფარგლებში გააფორმა. 2015-2016 აკადემიური წელს განათლების საერთაშორისო ცენტრი ხელს მოაწერს პარტნიორობისა და ურთიერთთანამშრომლობის მემორანდუმებსა და ჩარჩო ხელშეკრულებებს ევროპის, ამერიკისა და აზიის რიგ სასწავლო დაწესებულებებთან. ქართველ ახალგაზრდებს შესაძლებლობა ექნებათ მიიღონ სტიპენდია პარტნიორ უნივერსტეტებში სწავლის გასაგრძელებლად ცენტრის ფინანსური მხარდაჭერით. პარტნიორ უნივერსტეტებთან გამოფრმებული შეთანხმებების საფუძველზე, აპლიკანტებს საშუალება ექნებათ გაიარონ მხოლოდ ერთი სააპლიკაციო პროცედურა, რომლის ადმინისტრირებას ცენტრი უზრუნველყოფს.