პრემიერ-მინისტრის სამეგრელოში ვიზიტის დროს მთავრობის ადმინისტრაციის უფროსის მოადგილე ნინო კობახიძე სტუდენტებს შეხვდა.
ნინო კობახიძეს ზუგდიდის შოთა მესხიას სახელობის სახელმწიფო სასწავლო უნივერსიტეტმა უმასპინძლა. კობახიძე სტუდენტებსა და პროფესორ-მასწავლებლებს შეხვდა და პრემიერის საგანმანათლებლო ინიციატივები გააცნო.
ნინო კობახიძემ პრეზენტაციისას ზუგდიდელ სტუდენტებს თითოეული ინიციატივის არსი დეტალურად განუმარტა.
ზუგდიდელი სტუდენტებისთვის საინტერესო აღმოჩნდა პრემიერის საგანმანათლებლო ინიციატივები, რომლებიც საერთაშორისო განათლების ცენტრის შექმნას, საჯარო სამსახურში წარჩინებული სტუდენტების სტაჟირებასა და რეგიონიდან ჩამოსული მაღალი აკადემიური მოსწრების მქონე ხელმოკლე სტუდენტებისთვის საერთო საცხოვრებლის აშენებას გულისხმობს.
ნინო კობახიძემ სტუდენტების კითხვებსაც უპასუხა და მათთვის პრობლემატურ საკითხებში დახმარებას დაჰპირდა.
კობახიძემ ხაზი გაუსვა, რომ საქართველოს მთავრობისთვის განათლება პრიორიტეტული მიმართულებაა. სფეროს განვითარების მიზნით ახალი პროექტებისა შემუშავებაში კი პრემიერ-მინისტრი ირაკლი ღარიბაშვილი უშუალოდ არის ჩართული.
სტუდენტებთან შეხვედრამდე სასწავლებლის რექტორმა თეონა ხუფენიამ მთავრობის ადმინისტრაციის უფროსის მოადგილეს უნივერსიტეტი დაათვალიერებინა. შოთა მესხიას სახელობისზუგდიდის სასწავლო უნივერსიტეტში 900 სტუდენტი სწავლობს. მათ შორის, აფხაზი ახალგაზრდებიც არიან.