4 ივლისს განათლების საერთაშორისო ცენტრში 2018-19 სასწავლო წლის 3 სასტიპენდიო - სადოქტორო, სახელოვნებო და საჯარო მოხელეთა საზღვარგარეთ კვალიფიკაციის ამაღლების პროგრამის შედეგების შესახებ შემაჯამებელი პრესკონფერენცია გაიმართა. ცენტრის აღმასრულებელმა დირექტორმა ნინო ჭელიძემ ამ სასტიპენდიო პროგრამების გამარჯვებულები გამოცხადა. კონკურსანტებს კომისიის წევრებმა მაია წერეთელმა და ცენტრის კურსდამთავრებულმა დავით ნადირაძემ მიმართეს.
წელს განათლების საერთაშორისო ცენტრმა სტუდენტების მეხუთე თაობა შეარჩია, რომელსაც საშუალება მიეცემა სახელმწიფოს დაფინანსებით საზღვარგარეთ მიიღოს ცოდნა და სასწავლო პროგრამების დასრულების შემდეგ, მიღებული ცოდნის რეალიზება საკუთარ ქვეყანაში განაგრძოს.
სასტიპენდიო პროგრამების მიზანია, საქართველოს მოქალაქეებისთვის უცხო ქვეყნის საგანმანათლებლო დაწესებულებებში სწავლის ხელმისაწვდომობის ამაღლება. სამივე პროგრამა ითვალისწინებს როგორც სწავლის საფასურის, ასევე ცხოვრებისთვის საჭირო ხარჯების სრულ, ან ნაწილობრივ დაფინანსებას.
განათლების საერთაშორისო ცენტრი 2014 წელს დაარსდა და 2014-17 წლებში 500 - ზე მეტი სასწავლო სტიპენდია გასცა საზღვარგარეთ სწავლის მსურველ საქართველოს მოქალაქეებისთვის. 2014 წელს ცენტრს მხოლოდ 3 სასტიპენდიო პროგრამა ჰქონდა, 2017 წლიდან კი 9 პროგრამას ახორციელებს. 2018 წლიდან პროგრამებისა და სტიპენდიატების რაოდენობა კიდევ უფრო გაიზრდება.
სულ 2018-2019 სასწავლო წლისთვის გამოცხადებული კონკურსების ფარგლებში საზღვარგარეთ სწავლის გაგრძელების მსურველი საქართველოს 500-ზე მეტი მოქალაქე დარეგისტრირდა, განაცხადი კი 240-მა აპლიკანტმა შემოიტანა. პროგრამებით დაინტერესებულ პირებს ელექტრონული განაცხადის ფორმის შევსება ცენტრის ვებ.გვერდზე ერთი თვის მანძილზე, 25 აპრილიდან 2018 წლის 25 მაისის ჩათვლით შეეძლოთ.