განათლების საერთაშორისო ცენტრის აღმასრულებელი დირექტორი ნინო ჭელიძე სამხრეთ იუტას უნივერსიტეტის წარმომადგენლებს ამერიკელ არტ მენეჯერებს - უილიამ ბილ ბაირნსსა და რეიჩელ ბიშოპს შეხვდა. შეხვედრის ორგანიზატორი იყო განათლების საერთაშორისო ცენტრის 2016 წლის კონკურსის სტიპენდიანტი, სამხრეთ იუტას უნივერსიტეტის მაგისტრანტი დათო ნადირაძე.
შეხვედრაზე გადაწყდა, რომ ცენტრსა და სამხრეთ იუტას უნივერსიტეტს შორის თანამშრომლობა შედგება კვალიფიკაციის ამაღლების პროგრამის ფარგლებში. ცენტრი ხელს შეუწყობს საჯარო და აკადემიური სივრცისთვის ხელოვნების ადმინისტრირებისა და მართვის სპეციალისტების გადამზადებას. კურსის მონაწილეებს საშუალება ექნებათ, ადგილობრივი კულტურული კონტექსტის გათავლისწინებით, გაიღრმაონ ცოდნა ხელოვნების ადვოკატირების, კომუნიკაციის, ფონდების მოძიების მიმართულებით.
კონსულტაციები პროგრამის შინაარსის ჩამოყალიბებასა და განვითარებასთან დაკავშირებით დაგეგმილია კულტურისა და ძეგლთა დაცვის სამინისტროსთან და საგანმანათლებლო დაწესებულებებთან, სადაც ხელოვნების ადმინისტრირებას ასწავლიან. პროგრამის განხორციელება დაგეგმილია 2018 წლის ზაფხულისთვის.